Түркістан облысында «Нұрлы жер» бағдарламасымен 500 пәтер тапсырылады

18 Шілде, 2018 1532 0

Түркістан облысында сатып алу құқығынсыз арендалық тұрғын үй қорын құру бойынша ағымдағы жылы мемлекеттік бюджет есебінен 2449 пәтерлі 73 тұрғын үйдің құрылысы жүргізілуде. Биыл оның 500 пәтері, яғни 35 тұрғын үй пайдалануға беріледі. Бүгін бұл туралы Түркістан облыстық өңірлік коммуникациялар қызметінде өткен брифингте Құрылыс басқармасының басшысы Құттыбек Жамашев мәлім етті. Бұл туралы  Түркістан облысының әкімінің баспасөз қызметі хабарлап отыр.

Бұдан өзге, тұрғын үй құрылысы аудандарында инженерлік коммуникацияларды жайластыру бойынша 2018 жылы облыста мемлекеттік бюджет қаражаты есебінен 9 нысанның құрылысы жүргізілуде.

Сондай-ақ, Түркістан облысын перспективалық дамыту бойынша Түркістан қаласының бас жоспарын қайта әзірлеу бойынша ағымдағы жылдың 12 шілдесінде халықаралық конкурс жарияланған болатын.

«Қайта әзірленген бас жоспарға сәйкес, «Тұрғын үй құрылысын дамыту» концепциясы бекітілетін болады. Түркістан облысының әкімі Жансейіт Түймебаевтың идеясы бойынша концепцияда Түркістан қаласын түркі әлемінің рухани-мәдени орталығы ретінде дамыту мақсатында салынатын көпқабатты тұрғын үйлер Қожа Ахмет Ясауи кесенесінен биік болмайды. Өйткені - мавзолей мүмкіндігінше қаланың барлық жағынан көрінуі қажет. Салынатын баспаналар Орта Азиялық стильде, яғни көне дәуірдегі сәулетпен салынады», - деді Құттыбек Рахматтуллаұлы.

ҚР Үкіметінің 22.06.2018 жылғы № 372 қаулысымен бекітілген «Нұрлы жер» мемлекеттік тұрғын үй бағдарламасы аясында ағымдағы жылы Түркістан облысы үшін тұрғын үйді пайдалануға тапсыру жоспары 344,7 мың шаршы метр болып белгіленген. 2018 жылдың 6 айдың қорытындысы бойынша 202,4 мың шаршы метр тұрғын үй пайдалануға беріліп, өткен жылдың осы мерзімімен салыстырғанда 30 пайызға артқан.

Облыста 2018 жылы қаржыландырудың барлық көздері арқылы 79 көпқабатты тұрғын үйдің құрылысы жүргізілуде. Жыл қорытындысымен 35 үй пайдалануға беріледі. Құрылыс жұмыстарының нақты көлемі индексі бойынша 2018 жылдың жоспары – 140,8 млрд. теңге. Бұл меже 6 айдың қорытындысы бойынша 117,8 пайыз орындалды



Тегтер: Түркістан, тұрғынүй, бағдарлама, пәтер

Достар! Біздің телеграмма арнамызға жазылыңыздар және соңғы жаңалықтарды бірінші болып біліп отырыңыз. Жаңалықтар Сізге дереу жетеді!

Пікір қалдыру

Пікір жазу үшін сайтқа кіріп, телефон нөмірін растаңыз.