Кәсіпкер компания қызметкерлерінің 65 жастан асқан ата-аналарына тұрақты қаржылай қолдау көрсету туралы шешім қабылдағанын мәлімдеді. Бұл жөнінде ол жаңа жылға арналған корпоративтік жиында айтып, ұжыммен бірге жыл қорытындысын жасап, алдағы мерекелермен құттықтады.
Алагөзовтің айтуынша, кез келген табысты ұжымның қалыптасуына қызметкерлермен қатар, оларды тәрбиелеп, өмірге бағыт берген ата-аналардың да үлесі зор. Сол себепті компания әрбір ата-ананы айрықша құрметтейді.
Жаңа бастама аясында жасы 65-тен асқан әрбір ата-анаға ай сайын компания есебінен 50 мың теңге көлемінде қаржылай төлем жасалмақ. Кәсіпкер бұл қадамды аға буынға деген алғыс пен ризашылықтың нақты көрінісі деп атап өтті.
Аталған шешім қоғам тарапынан әлеуметтік қолдаудың тың үлгісі ретінде бағаланып, кәсіпкердің азаматтық ұстанымын айқындай түсті.
