11 айдың қорытындысы бойынша, Астанадағы LRT құрылысына (әуежайдан жаңа теміржол вокзалына дейінгі учаске) республикалық бюджеттен 329,6 млрд теңге бөлінген. Бұл 2025 жылға жоспарланған соманың 99,2%-ын құрайды.
Қаңтар–қараша айларындағы жоғары көрсеткіш LRT құрылысының қаржыландырылуы күрт артқанын аңғартады: 2024 жылы барлығы 28,4 млрд теңге, 2023 жылы — 52,4 млрд теңге ғана жұмсалған. Барлық жағдайда қаржы Ұлттық қордан мақсатты трансферттер түрінде берілген.
LRT құрылысына кеткен шығын көлік және коммуникациялар саласына арналған республикалық бюджет шығынының шамамен үштен бірі. Мәселен, автомобиль жолдарын салу, қайта жаңғырту, жөндеу және күтіп ұстауға 258,5 млрд теңге жұмсалған. Айта кетерлігі, республикалық бюджет Алматыдағы рельсті көлікті дамытуға да қаржы бөледі — 2025 жылы 25,6 млрд теңге (метрополитен құрылысы). 2024 жылы мұндай шығындар болмаған, ал 2023 жылы олар 9,4 млрд теңгені құраған.
Астанадағы LRT құрылысы 2017 жылдың мамырында Қытайдың Мемлекеттік даму банкінің 1,5 млрд доллар көлеміндегі несие желісін тарту арқылы басталды. Алайда 2018 жылы қарыз қаражатының бір бөлігі (208 млн доллар) орналастырылған Астана банкі лицензиясынан айырылғаннан кейін кредитор қаржыландыруды тоқтатты.
2019 жылы сыбайлас жемқорлық жанжалы аясында құрылыс мүлдем тоқтатылды — сол сәтке дейін құрылыс-монтаж жұмыстарының 15%-ы ғана орындалған еді. Сотта анықталғандай, жобаны іске асыруға жауапты лауазымды тұлғалар келісімшарт құнын қолдан өсіріп, айырмасын иемденген, ол 5,8 млрд теңгені құраған. Қытай несиесіне келсек, нәтижесінде Қазақстан билігі оны мерзімінен бұрын өтеді.
2023 жылы LRT құрылысы бюджет қаражаты есебінен қайта жанданды. Сол уақыттан бері эстакадалық қалалық көлік жүйесін іске қосу мерзімдері бірнеше рет кейінге шегерілді. Ақырында сынақ пайдалану 2025 жылдың қыркүйегінде басталды. Ал толық пайдалануға беру 2026 жылға жоспарланған.
