Астанада Жаңа жылды қайда қарсы алуға болады?
Астанада Жаңа жыл мерекесіне орай ауқымды мерекелік бағдарламалар ұйымдастырылады. 31 желтоқсан күні сағат 21:00-ден бастап қаланың үш негізгі алаңында жаңажылдық концерттер өтеді.
Олар — «Қазақ елі» монументі алдындағы алаң, EXPO аумағы және қала әкімдігі алдындағы алаң.
2026 жыл қарсаңында елорда тұрғындары мен қонақтары белгілі өнер жұлдыздарының өнерін тамашалай алады. Сахнада Зарина Омарова, Еркеш Хасен, Маржан Арапбаева, Сәкен Майғазиев, Қазыбек Құрайыш, Серік Ибрагимов, Жұбаныш Жексенұлы, Ақбота Керімбекова, сондай-ақ «Меломен» және «Бәйтерек» топтары өнер көрсетеді.
Ал түн ортасында қала тұрғындары мен қонақтары үшін мерекелік фейерверк ұйымдастырылады. Отшашу Ботаникалық бақта және «Атырау» көпірі маңында атылады.