Селфи қайғылы аяқталды: Тайландта жас француз футболшысы қаза тапты
Тайландта демалып жүрген француз футболшысы Алексис Вергос қайғылы жағдайда көз жұмды.
Оқиға селфи жасамақ болған сәтте орын алғаны хабарланды.
Қайғылы жағдай Самуи аралындағы Намуанг-2 сарқырамасының маңында болған. Ақпаратқа сәйкес, футболшы сарқыраманың әсем көрінісін түсіріп тұрған кезде тайып кетіп, бірнеше метр төменге құлаған. Құлау кезінде ол басынан ауыр соққы алған.
Алдын ала сот-медициналық сараптама Вергостың өлімі бас сүйегіне тиген ауыр жарақаттың салдарынан болғанын анықтады. Марқұм небәрі 22 жаста еді.
Басылым мәліметінше, құтқару қызметі спортшының денесін судан шығарып, сарқыраманың етегіне жеткізген. Сол сәтте оның қалыңдығы Романа да тайып кету қаупіне тап болғанымен, ағаш бұтағына жармасып, аман қалған.
Алексис Вергос бұған дейін Францияның Бретань лигасында өнер көрсететін «Кемпер Эрге-Армель» клубының құрамында ойнаған. Бұл қайғылы оқиға футбол қауымдастығында үлкен күйзеліспен қабылданды.