Қазақстанда психологтардың мәртебесі заңмен бекітіледі: Мәжіліс жаңа бастаманы қолдады
Елімізде психологтардың қызметі алғаш рет заңмен реттелмек — тиісті заң жобасы Мәжілісте бірінші оқылымда мақұлданды.
Қазақстан Парламенті Мәжілісі психологиялық қызмет саласын жүйелеуге бағытталған маңызды заң жобасын бірінші оқылымда қолдады. «Психологиялық қызмет туралы» құжат мамандардың жұмыс тәртібін нақтылап, азаматтардың құқықтарын қорғауды көздейді.
Жұмыс тобының жетекшісі Айна Мусралимованың айтуынша, заң жобасы «психолог» ұғымын ресми түрде айқындап, бұл салада қызмет ету үшін қойылатын білім мен біліктілік талаптарын белгілейді.
Құжатта кәсіби әдеп нормаларына ерекше мән берілген. Атап айтқанда, құпиялылықты сақтау, клиенттің саналы келісімін алу және манипуляциялық әдістерді қолдануға тыйым салу қарастырылған.
Заң жобасы психологиялық көмектің бірнеше түрін қамтиды: дәстүрлі бетпе-бет кеңес беру, онлайн формат және аралас қызмет көрсету. Сонымен қатар, қызмет көрсету еріктілік қағидатына негізделеді және барлық шарттар клиент үшін ашық болуы тиіс.
Психологтардың құзыретіне психодиагностика жүргізу, кеңес беру, психокоррекциялық және дағдарыстық көмек көрсету кіреді. Алайда оларға дәрі-дәрмек тағайындауға тыйым салынады — бұл медициналық қызметтен нақты шектеу ретінде белгіленген.
Сондай-ақ, барлық мамандарды қамтитын бірыңғай мемлекеттік реестр құру жоспарланып отыр. Бұл тізімді Еңбек және халықты әлеуметтік қорғау министрлігі жүргізеді және ол ашық қолжетімді болады.
Жаңа кәсіби стандарттарды енгізу психологиялық қызмет сапасын арттырып, қоғам сенімін күшейтеді деп күтілуде.