Қазақстанда жасыл экономикаға көшу – болашаққа инвестиция

Қазіргі таңда Қазақстанның барлық өңірлерінде таза энергия көздерін дамытуға зор мүмкіндік бар. «Жасыл экономика» – табиғи ресурстарды тиімді пайдалану арқылы қоғамның әл-ауқатын арттыруға және өндірістік қалдықтарды қайта өңдеуге негізделген жүйе. Бұл бағыт әсіресе сарқылуға ұшыраған ресурстарды үнемдеуге қызмет етеді және экологиялық таза өнімдер шығаруға мүмкіндік береді.

Мамандардың пікірінше, Қазақстан «жасыл экономикаға» уақытылы көшсе, көптеген дамыған елдердің бастан кешкен экологиялық дағдарыстарын болдырмай, экономиканы тұрақты дамытуға қол жеткізе алады. Әлемдік болжамдарға сәйкес, 2040 жылға қарай электроэнергияға деген сұраныс 70%-ға өседі. Бұл ретте дамыған елдер баламалы энергетиканы кеңінен қолдана бастады, ал табиғи ресурстарға тәуелді дамушы елдерде экономикалық өсім баяулау тенденциясын көрсетуде.

БҰҰ бастамасымен енгізілген «тұрақты даму» концепциясы елдің өркендеуін қамтамасыз ететін мақсаттар жиынтығын ұсынады. Қазақстан Президенті Қ.Тоқаев өз Жолдауында тұрақты даму мақсаттары аясындағы жұмысты бірінші кезекте жүзеге асыру керектігін атап өтті. Оның ішінде 7-ші мақсат: «Барлық үшін қымбат емес, сенімді, тұрақты және заманауи энергия көздеріне қолжетімділікті қамтамасыз ету».

Энергетикалық ресурстарды үнемдеу, өндіріс қуатын арттыру және қоршаған ортаны қорғау XXI ғасырдағы басты міндеттердің бірі болып отыр. Халық санының өсуі, өндіріс пен ауыл шаруашылығында энергия тұтынудың артуы дәстүрлі энергия көздерінің жетімсіздігін көрсетеді. Ғалымдардың зерттеулері бойынша, жерасты отын қорларын сақтау үшін күн, жел, су, биомасса сияқты жаңартылатын энергия көздерін қолдану ең тиімді әдіс болып табылады.

Білімді кадрлар мен заманауи технологияларды пайдалану арқылы Қазақстан өз энергетикалық тәуелсіздігін нығайтып, экономиканы дамытуға және экологияны қорғауға үлес қосады. Мұндай шешімдер еліміздің болашағын қамтамасыз етіп, халықтың әл-ауқатын арттыруға бағытталған маңызды қадам болып саналады.