Астанада «Заң мен Тәртіп» идеологиясын жүзеге асыру аясында балалар хоккей турнирі өтті. Жарыс Есіл ауданы прокуратурасының бастамасымен «Барыс Арена» мұз сарайында ұйымдастырылды.
Турнирдің мақсаты – жасөспірімдер арасында құқықбұзушылықтың алдын алу, бұқаралық спортты дамыту және өскелең ұрпақтың бойына тәртіп, заңға құрмет пен адал бәсеке қағидаттарын сіңіру.
Салтанатты ашылу және марапаттау рәсіміне Астана қаласы прокурорының орынбасары Маратбек Мирзамуратов, Астана қаласы прокуратурасы аппаратының басшысы Жандос Досанов, Есіл ауданының прокуроры Ерденбек Тоқбаев, қалалық Дене шынықтыру және спорт басқармасының басшысы Василий Левит, «Барыс» хоккей клубының бас директоры Сәкен Мұсайбеков, спорт блогері әрі «JanaMen» жобасының негізін қалаушы Айтым Жақыпов және Олимпиада чемпионы Дмитрий Баландин қатысты.
Турнирге елорданың 2017–2018 жылы туған жас хоккейшілерінен құралған алты команда қатысты. Жарыс барысында балалар жоғары дайындық деңгейін, командалық рух пен жеңіске деген жігерін көрсетті.
Есіл ауданының прокуроры Ерденбек Тоқбаевтың айтуынша, мұндай бастамалар жасөспірімдерді дұрыс ортаға бағыттап, олардың спорт арқылы тәртіпке бейімделуіне ықпал етеді.
Ал спортшы Айтым Жақыпов балаларға тұрақты түрде жаттығуға қатысып, бапкерлердің ақылын тыңдаудың маңызын атап өтті.
Турнир қорытындысы бойынша үздік командалар мен қатысушылар арнайы марапаттарға ие болды.
