Шерхан Аймаханға өмір бойына бас бостандығынан айыру жазасы тағайындалды
Шымкенттегі Нұрай Серікбайдың өліміне қатысты сот үкімі шықты. 13 тамызда Шерхан Аймахан өмір бойына бас бостандығынан айырылды. Сот отырысы барысында айыпталушының әрекеті, марқұмға келтірілген жарақаттар және оның қылмыс жасаған сәттегі психологиялық жағдайы жан-жақты қаралған, деп хабарлайды Newsroom.kz.
Шымкентте Нұрай Серікбайдың қазасына қатысты сот процесі аяқталды. Сот Шерхан Аймаханды кінәлі деп танып, оған өмір бойына бас бостандығынан айыру жазасын тағайындады.
Сотта іс Қазақстан Республикасы Қылмыстық кодексінің үш бабы бойынша қаралған. Олардың қатарында аса қатыгездікпен жасалған адам өлтіру, некеге тұруға мәжбүрлеу және сталкингке қатысты баптар бар. Сот материалдарында Нұрай Серікбайдың денесінен 35 жарақат анықталғаны айтылды. Жарақаттар оның беті, мойны, қолы, іш қуысы, иығы, кеудесі және арқасынан тіркелген.
Қорғау тарапы Шерхан Аймахан қылмыс кезінде аффект жағдайында болғанын алға тартқан. Алайда бұл нұсқаны сот сараптамасы қолдамаған. Сарапшылар оның сол сәтте өз әрекетінің мәнін түсініп, оны бақылау қабілетін сақтағанын анықтаған. Осылайша сот айыпталушыға ең қатаң жаза түрін тағайындады. Үкім 13 тамызда Шымкентте жарияланды.