Иранда АҚШ тарапынан жасалуы мүмкін кез келген дұшпандық әрекетке дайын екенін және экономикалық қысымға қарсы тұру үшін арнайы сценарийлер әзірлегенін мәлімдеді. Бұл туралы Ислам революциясы сақшылар корпусының өкілі генерал Мохсен Мохеби айтты.
Оның сөзінше, АҚШ президенті Дональд Трамптың Иранға қарсы ауқымды экономикалық соғыс басталғаны туралы мәлімдемесі Вашингтонның әскери бағытта нәтижеге жете алмағанын көрсетеді.
«Егер сіз әскери бағытта жеңіске жетсеңіз, экономикалық соғыс бастаудың қажеті болмас еді. Экономикалық соғыс деген жаңа нәрсе ме? Сіз оны 47 жылдан бері жүргізіп келесіз және экономикамыздың барлық саласына санкция салдыңыз», — деді Мохеби.
КСИР өкілі Иранның санкциялар мен өзге де шектеулерге қарсы іс-қимыл жоспары барын атап өтті. Оның айтуынша, Тегеранға қарсы кез келген қадамға жауап беретін дайындық жасалған.
«Бізде қарсыластың кез келген дұшпандық қадамына арналған сценарий бар», — деді ол.
Мохеби Иранның америкалық шектеулерге қарамастан, өзге мемлекеттермен экономикалық ынтымақтастықты жалғастырып жатқанын да айтты. Оның сөзінше, Тегеран санкцияларды айналып өтеді және оның нәтижесі жақын уақытта көрінеді.
20 тамызда Дональд Трамп Иранға қарсы «ең күйреткіш экономикалық операцияның» басталғанын мәлімдеп, Тегеранға көмектесетін кез келген елдің өзі де ірі экономикалық салдарға тап болатынын ескерткен еді.
