«Байтақ» сайлау нәтижесін мойындамайтынын мәлімдеді ме?
Қазақстанның «Байтақ» жасылдар партиясы Құрылтай депутаттарының сайлау қорытындысын мойындамайтынын мәлімдеді. Партия өкілдері дауыс беру барысында бірқатар заң бұзушылықтар болғанын айтып, сайлау нәтижелеріне қатысты наразылығын білдірді. Newsroom.kz хабарлайды.
Партияның мәлімдеуінше, сайлау күні және оған дейінгі кезеңде сайлау процесіне қатысты бірқатар мәселелер тіркелген. «Байтақ» өкілдері өздеріне түскен ақпараттар мен байқаушылардың мәліметтерін жинақтап жатқанын айтты.
Бұл мәлімдеме халықаралық байқаушылардың сайлау процесіне берген бағасынан ерекшеленеді. Мәселен, ТМД бақылаушылар миссиясы Қазақстандағы сайлауда дауыс беру нәтижесіне ықпал етуі мүмкін заң бұзушылықтар анықталмағанын мәлімдеді. Миссия өкілдері сайлауды ашық, бәсекелі және әділ өтті деп бағалады.
Сондай-ақ ШЫҰ байқаушылары да сайлау барысында дауыс беру барысы мен нәтижесіне әсер ететін заң бұзушылықтарды тіркемегенін хабарлады.
Алдын ала ресми нәтижеге сәйкес, «Байтақ» партиясы 1,07% дауыс жинаған. Осы көрсеткішпен партия Құрылтайға өту үшін қажетті 5 пайыздық межеден аса алмады.
Айта кетейік, сайлауалды кезеңнің өзінде заң талаптарын бұзуға қатысты фактілер тіркелген. 22 тамыздағы мәлімет бойынша, сайлау заңнамасын бұзудың сегіз жағдайы анықталған, оның үшеуі заңсыз сауалнама жүргізуге, бесеуі тыйым салынған кезеңдегі үгітке қатысты болған.
«Байтақтың» мәлімдемесі мен сайлау нәтижелеріне қатысты ұстанымы бойынша партияның нақты қандай талаптар қоятыны әзірге қосымша түсіндіруді қажет етеді. Партия келтірген фактілер толық зерттеліп, тиісті органдардың құқықтық бағасы берілгеннен кейін жағдайдың одан әрі қалай өрбитіні белгілі болады.