Алматыда автобуста ер адам қызға шабуыл жасады
Алматыда №227 автобуста жолаушы қызға егде жастағы ер адам шабуыл жасаған. Жәбірленушінің айтуынша, оқиға қыз ер адамнан орын босатуын сұрағаннан кейін болған. Бұл туралы Newsroom.kz хабарлайды.
Қыздың сөзінше, ол Сейфуллин–Шолохов көшелері қиылысындағы аялдамадан автобусқа отырып, артқы орындыққа жайғасқан. Сол жерде отырған ер адамнан өзіне орын босату үшін жылжуын сұраған.
Алайда ер адам ескертусіз қыздың мойнынан ұстап, қылқындыра бастаған. Жәбірленуші шабуылдаушыдан босауға тырысып, оны итеріп, тепкен. Сол сәтте жанында отырған басқа жолаушы көмек көрсетіп, қыздың басқа орынға ауысуына мүмкіндік берген.
Қыз оқиға туралы Threads әлеуметтік желісінде жазып, жолаушыларды сақ болуға шақырды.
Полиция оқиғаға қатысушылардың жеке басын анықтаған. Ер адам әкімшілік жауапкершілікке тартылып, сот шешімімен 10 тәулікке әкімшілік қамауға алынған.
Оқиғаға қатысты тиісті шаралар қабылданды.