Оқиға 6 қыркүйекте Әлихан Бөкейхан ауданындағы саяжай қоғамдарының бірінде болған. Полиция оқиға орнына келген кезде 43 жастағы ер адам мен 55 жастағы әйелдің денесін тапқан. Осы факті бойынша «Кісі өлтіру» бабы бойынша қылмыстық іс қозғалды.
Жедел-іздестіру және тергеу шаралары барысында полиция 56 жастағы ер адамды күдікті ретінде анықтап, ұстаған. Ведомство мәліметінше, ол кінәсін мойындаған. Күдікті уақытша ұстау изоляторына қамалды.
Алдын ала ақпарат бойынша, қаза тапқандардың бірі саяжай қоғамының төрағасы, екіншісі жергілікті қоғам белсендісі болған. Кей деректе ер адамның заңгер болып жұмыс істегені де айтылады.
Бұған дейін «Оптимист» саяжай қоғамын басқаруға қатысты даулар болғаны, төрағалардың бірнеше рет ауысқаны және жекелеген мәселелердің сотқа дейін жеткені туралы ақпарат тарады. Сондай-ақ ұсталған адамның бұған дейін қоғам төрағасы болғаны жөнінде мәлімет бар. Алайда бұл деректердің қылмысқа қатысы бар-жоғын полиция әзірге растаған жоқ.
Қазір тергеу жалғасып жатыр. Құқық қорғау органдары қылмыстың нақты себебі мен күдіктінің ықтимал уәжін анықтауда.
