11 қыркүйек терактілерінің 25 жылдығында ЦРУ «Әл-Каида» шабуылдарына қатысты 71 құпиясыздандырылған құжатты жариялады. Бұл туралы NBC News хабарлады.
Ведомство сайтында орналастырылған материалдар 1998 жылғы ақпан мен 2001 жылғы 12 қыркүйек аралығын қамтиды. Осылайша ЦРУ-дың 100 беттен астам талдау дерегі алғаш рет жалпыға қолжетімді болды.
Құжаттар президент Билл Клинтон мен оның ізбасары Джордж Бушқа ЦРУ және басқа да барлау органдары ұсынған күнделікті баяндамалардың бір бөлігі болып саналады. ЦРУ бұл жинақты 11 қыркүйек оқиғаларына қатысты президенттік күнделікті брифингтерден жарияланған ең көлемді материал деп атады.
«Құжаттар ЦРУ талдаушыларының “Әл-Каида” қызметі туралы түсінігі уақыт өте қалай өзгергенін, сондай-ақ олардың Усама бен Ладеннің шабуыл жасау жоспарына назар аударуға және ескертуге тырысқанын көрсетеді», — делінген ведомство мәлімдемесінде.
ЦРУ директоры Джон Рэтклифф бұл жарияланымды ашықтық пен есептілікті қамтамасыз етудегі «бұрын-соңды болмаған қадам» деп бағалады. Ол X әлеуметтік желісінде америкалықтар енді өз елінің сол қайғылы күнге дейінгі барлау деректерімен өздері таныса алатынын жазды.
2001 жылғы 11 қыркүйектегі терактілер салдарынан 2977 адам қаза тапты. Бұл оқиға қауіпсіздік, барлау және терроризммен күрес тәсілдеріне ұзақ жылдарға әсер етті.
