Жоба жүзеге асса, Қазақстан, Түркия, Әзербайжан, Қырғызстан және Өзбекстан азаматтары аталған елдер арасында шетелдік паспортсыз, жеке куәлік арқылы сапарлай алады.
Жоба әзірге дайындық кезеңінде
Түркі мемлекеттері ұйымының бас хатшысы Кубанычбек Омуралиевтің айтуынша, қазір тиісті дайындық жұмыстары жүргізіліп жатыр.
«Бес ел — Түркия, Әзербайжан, Қырғызстан, Қазақстан және Өзбекстан. Жобаны мүмкіндігінше қысқа мерзімде аяқтау үшін дайындық жұмыстары жалғасуда», — деді ол.
Қазіргі уақытта нақты іске қосу мерзімі жарияланған жоқ.
Қазақстандықтар қай елдерге жеке куәлікпен бара алады?
Қазір Қазақстан азаматтары Ресей мен Қырғызстанға жеке куәлікпен кіре алады.
Сондай-ақ Қазақстан мен Армения арасында шекараны жеке куәлікпен кесіп өтуге мүмкіндік беретін келісім жасалған. Алайда қазіргі таңда екі ел арасындағы сапарлар үшін паспорт талап етіледі.
Қазақстан мен Өзбекстан да азаматтардың екі ел арасында жеке куәлікпен қатынауын жеңілдету мәселесін талқылап жатыр.
Егер жаңа жоба іске асса, Қазақстан азаматтарының Түркия, Әзербайжан, Қырғызстан және Өзбекстанға баруы үшін шетелдік паспорт қажет болмауы мүмкін.
