Алматы полициясы жүргізушілердің жаяу жүргіншілерге жол беру талаптарын сақтауын күшейтіп бақылап жатыр.
Жыл басынан бері қалада жаяу жүргіншілер қатысқан шамамен екі мың жол-көлік оқиғасы тіркелді. Оқиғалардың салдарынан 24 адам қаза тауып, 2 мыңнан астам адам жарақат алған.
Қазір Қазақстанның барлық өңірінде «Жаяу жүргінші» профилактикалық акциясы өтіп жатыр. Соның аясында Алматы полициясы жол қозғалысы ережелерін сақтауға бақылауды күшейткен. Әсіресе, жүргізушілердің жаяу жүргіншілер өткелінде жаяу адамдарға басымдық беруі тексерілуде.
Полиция қызметкерлері мектептерде де түсіндіру жұмыстарын жүргізіп жатыр. Оқушылармен жол қауіпсіздігі тақырыбында әңгіме өткізіліп, балаларға жарық қайтаратын элементтер таратылған.
— Жолдағы қауіпсіздік әрбір қозғалысқа қатысушыға байланысты. Жүргізушілер жаяу жүргіншілер өткеліне жақындаған кезде ерекше мұқият болуы керек. Ал жаяу жүргіншілер жол қозғалысы ережелерін сақтап, жолды тек белгіленген жерден өтуі қажет, — деді Алматы қаласы полиция департаменті әкімшілік полиция басқармасының бастығы Абдинур Тасыбаев.
Еске салайық, бұған дейін Алматы облысында мас күйінде жол апатын жасаған бұрынғы полицей 10 жылға бас бостандығынан айырылған болатын.
