Шығыс Қазақстан облысында Рахман қайнарына қарай баратын бағыттағы Пихтовка өзені үстінен салынған көпірдің құрылысы аяқталды. ҚазАвтоЖол бұл нысанды өңірдегі ең күрделі әрі ауқымды көпір құрылыстарының бірі деп атады.
Көпірдің биіктігі 45 метрге, ұзындығы 175 метрге жетеді. Соңғы, жетінші аралықтың орнатылуымен жаңа құрылыс терең тау шатқалының екі жағын толық жалғап отыр.
Нысан жеті аралықтан тұрады, әрқайсысының ұзындығы 24 метр. Құрылымда екі жағалау және алты аралық тірек бар, жалпы саны — сегіз тірек.
«Бүгін біз үшін шын мәнінде маңызды күн. Пихтовка арқылы өтетін көпірдің құрылысы — үлкен команданың орасан еңбегінің нәтижесі. Нысан күрделі тау жағдайында салынды, мұнда әрбір инженерлік шешім барынша дәлдік пен жауапкершілікті талап етті. Осы 175 метр көпірдің артында инженерлеріміздің, құрылысшыларымыздың және жобаға тартылған барлық маманның айлар бойғы тынымсыз еңбегі тұр. Мұндай күрделі нысанды Шығыс Қазақстанда іске асырғанымызды мақтан тұтамыз», — деді Шығыс Қазақстан облыстық филиалының директоры Нұрбек Темірханов.
Құрылысқа шамамен 150 маман, арнайы техника мен жабдық тартылды. Бетон жұмыстарын үздіксіз жүргізу үшін құрылыс алаңында мобильді бетон зауыты іске қосылған.
Қазір нысанды абаттандырудың соңғы кезеңі жүріп жатыр: бетон тумбалар мен қоршаулар орнатылуда, парапеттер қойылып жатыр, еңістер Рено матрастары мен габион конструкцияларымен бекітілуде. Сондай-ақ жол қауіпсіздігін қамтамасыз етуге бағытталған жұмыстар атқарылып жатыр. Асфальтобетон жабындысы қыркүйек айының соңына дейін төселуі тиіс.
