Қайғылы оқиға 22 қыркүйек күні сағат 20:00 шамасында болған. Полицияға әйелге шабуыл жасалғаны туралы хабарлама түскен. Оқиға орнына барған қызметкерлер әйелдің пышақ жарақатын алғанын анықтаған. Ол алған жарақатынан сол жерде көз жұмған.
Күдікті көп ұзамай ұсталып, уақытша ұстау изоляторына қамалған. Аталған факті бойынша қылмыстық іс қозғалып, тергеу басталды.
Бұған дейін әлеуметтік желілерде күдіктінің полиция қызметкері болуы мүмкін деген ақпарат тараған. Алайда Астана қаласының Полиция департаменті бұл мәліметті жоққа шығарды.
Ұсталған ер адам әйелдің бұрынғы күйеуі болуы мүмкін. Қазір қылмыстық істің барлық мән-жайы анықталып жатыр.
Айта кетейік, соңғы күндері Қазақстанда әйелдерге қатысты бірнеше ауыр қылмыс тіркелді. 21 қыркүйекте Семейде 19 жастағы студент Диляра Салимбаева қаза тапты. Сонымен қоса, қазақстандық қоғамда Шымкентте қаза тапқан 21 жастағы Нұрай Серікбайдың өлімі де үлкен резонанс тудырған еді.
