Мәслихат сайлауы: кандидаттарға қанша теңге бөлінеді?
Қазақстанда 29 қарашада өтетін мәслихат депутаттарының кезектен тыс сайлауына қатысатын кандидаттардың шығындары белгіленді. Қаражат республикалық бюджеттен бөлініп, үгіт-насихат жұмыстарына, БАҚ-та сөз сөйлеуге және көлік шығындарына жұмсалады. Бұл туралы Newsroom.kz BES.media басылымына сілтеме жасап хабарлайды.
Орталық сайлау комиссиясының шешіміне сәйкес, елорда, облыстар мен республикалық маңызы бар қалалардағы мәслихат депутаттығына кандидаттарға БАҚ-та сайлауалды бағдарламасын таныстыруға және баспасөзде немесе интернет-басылымдарда екі мақала жариялауға 410 мың теңге қарастырылған. Ал сайлауалды іс-шаралар мен үгіт материалдарын шығаруға 180 мың теңге, көлік шығындарына 110 мың теңге бөлінеді.
Қалалық мәслихаттарға кандидаттар үшін БАҚ-та сөз сөйлеу мен жарияланымдарға 400 мың теңге, үгіт-насихат іс-шаралары мен материалдарына 170 мың теңге, көлік шығындарына 80 мың теңге белгіленген.
Аудандық мәслихат депутаттығына кандидаттарға БАҚ-та сөз сөйлеу және жарияланымдар үшін 290 мың теңге, үгіт-насихат жұмыстарына 130 мың теңге, көлік шығындарына 80 мың теңге қарастырылған.
ОСК бұл шешімдерді «Қазақстан Республикасындағы сайлау туралы» Конституциялық заңның талаптарына сәйкес қабылдаған. Қаулылар аумақтық және округтік сайлау комиссияларына, сондай-ақ бірмандатты округтер бойынша тіркелген кандидаттарға жеткізіледі.
Еске салайық, мәслихат депутаттарының кезектен тыс сайлауы 2026 жылғы 29 қарашаға белгіленген.