Қытайда Мбаппе қатысатын ойындарды көрсету тоқтатылды
Қытайдың мемлекеттік телеарнасы мадридтік «Реал» клубының шабуылшысы Килиан Мбаппе қатысатын Испания чемпионатының матчтары мен басқа да жарыстардың трансляциясын тоқтатты. Бұған футболшының Қытайдың бұрынғы басшысы Мао Цзэдун бейнеленген мем туралы айтқан пікірі себеп болған.Бұл туралы Newsroom.kz хабарлайды.
Жанжал Мбаппенің сұхбаты түсірілген видео әлеуметтік желілерде тарағаннан кейін өршіді. Футболшы өзіне қатысты ең күлкілі мем туралы айтып, онда оның жүзі Мао Цзэдунның портретімен біріктірілген суретті еске алған. Алайда ол Қытайдың бұрынғы басшысының есімін тікелей атамай, суреттегі адамды «қытайлық диктатор» деп сипаттаған.
Бұл пікір Қытайдың әлеуметтік желілерінде сынға ұшырады. Осыдан кейін Dongpeng сусын өндірушісі, Mengniu сүт өнімдері компаниясы және Milkground ірімшік өндірушісі футболшымен ынтымақтастықты тоқтататынын мәлімдеді.
Сонымен қатар Қытайдың мемлекеттік телеарнасы Мбаппе қатысатын Испания чемпионатының матчтары мен өзге де спорттық жарыстарды эфирден алып тастады. Трансляциялардағы футболшының бейнесі бар жарнамалық материалдар да көрсетілмейтін болды.
27 қазанда Мбаппе жанжалға байланысты ресми түрде кешірім сұрады. Ол пікірінің ойланбай айтылғанын және Қытай тұрғындары мен әлемдегі қытай қауымдастықтарының өкілдерін ренжітуі мүмкін екенін мойындады. Сондай-ақ футболшы Қытай халқына және оның тарихына құрметпен қарайтынын атап өтті.
Испанияның Ла Лига чемпионатының басшылығы да қытайлық жанкүйерлерден кешірім сұрап, жағдайды реттеу үшін жергілікті серіктестермен жұмыс істеп жатқанын мәлімдеді.