Халықтың 400 млрдқа жуық қарызы кешірілді
Қазақстанда қарызын өтей алмаған 98,6 мыңға жуық азамат ресми түрде банкрот деп танылды. Олардың жалпы берешегінің 373 млрд теңгеден астамы есептен шығарылған. Сонымен қатар тағы 23 мыңнан астам қазақстандыққа қатысты банкроттық рәсімі жүргізіліп жатыр. Бұл туралы Мемлекеттік кірістер комитеті мәлімдеді.
Қаржылық міндеттемелерін орындай алмайтын азаматтар Қазақстан заңнамасына сәйкес өзін банкрот деп жариялауға өтініш бере алады. Қазіргі уақытта бұл үшін екі түрлі рәсім қарастырылған.
Банкроттықтың қандай түрлері бар?
Бірінші – соттан тыс банкроттық. Бұл рәсім қарыз көлемі 1 600 айлық есептік көрсеткіштен (АЕК) аспайтын және атында мүлкі жоқ азаматтарға арналған.
Екінші – сот арқылы банкроттық. Бұл тәсіл қарыз сомасы 1 600 АЕК-тен асқан немесе азаматтың атында автокөлік, тұрғын үй және басқа да мүлік болған жағдайда қолданылады.
Мемлекеттік кірістер комитетінің дерегінше, аталған екі рәсімнің нәтижесінде шамамен 98,6 мың адам банкрот деп танылған. Олардың 373 млрд теңге көлеміндегі берешегі есептен шығарылды.
Ал қазіргі уақытта тағы 23 195 азаматтың банкроттық ісі қаралуда. Олардың жалпы қарызы 134,5 млрд теңгеге жеткен.
Банкрот деп танылған азаматтарға қандай шектеулер қойылады?
Банкроттық рәсімі қарыздан толық құтылудың оңай жолы болғанымен, оның бірқатар құқықтық салдары бар. Атап айтқанда, банкрот деп танылған азаматтарға:
- бес жыл бойы банктен несие және микрокредит алуға тыйым салынады;
- қайтадан банкроттық рәсімінен өту үшін жеті жыл күту қажет;
- үш жыл бойы азаматтың қаржылық жағдайына мемлекеттік мониторинг жүргізіледі.
Сонымен қатар банкроттық рәсімі барлық берешекті есептен шығармайды. Мысалы, алимент бойынша қарыздар кешірілмейді. Мұндай міндеттемелерді азамат белгіленген тәртіппен өзі өтеуге тиіс.
Осыған байланысты мамандар банкроттыққа өтініш бермес бұрын оның барлық салдарын мұқият зерделеуге кеңес береді. Себебі банкрот мәртебесін алғаннан кейін азамат бірнеше жыл бойы қаржылық шектеулерге тап болады.
Сондықтан бұл рәсімге жүгіну туралы шешімді әр азамат өзінің қаржылық жағдайын, қарыз көлемін және алдағы жоспарларын ескере отырып қабылдағаны жөн.