Астана – Франкфурт рейсі Ақтөбеге шұғыл қонды
Air Astana әуе компаниясының Астанадан Франкфуртқа бағыт алған ұшағы қозғалтқыштардың біріндегі ақауға байланысты Ақтөбе әуежайына шұғыл қонуға мәжбүр болды. Оқиға авиациялық қауіпсіздік талаптарына сәйкес ауыр авиациялық инцидент ретінде тіркелді.
Алдын ала мәлімет бойынша, рейс барысында әуе кемесінің бір қозғалтқышы істен шығып, экипаж дабыл белгісін берген. Осыдан кейін ұшақты Ақтөбеге шұғыл қондыру туралы шешім қабылданған.
Ұшақ бортында 93 жолаушы болған. Олардың арасында төрт бала мен бір нәресте бар. Сондай-ақ рейсте 9 экипаж мүшесі қызмет атқарған.
Қону кезінде әуежайдың барлық төтенше жағдай қызметтері мен жерүсті мамандары жұмылдырылды. Ұшақ сәтті қонып, жолаушылардың қауіпсіздігі қамтамасыз етілді.
Оқиға Қазақстанның Көлік министрлігі тарапынан «ауыр авиациялық инцидент» санатына енгізілді. Қазір арнайы департамент тексеру жұмыстарын бастап, қозғалтқыштың істен шығу себептерін анықтап жатыр.