Медицина қызметкері Таразда соққыдан көз жұмды
Таразда медицина қызметкері ер адамның өліміне қатысты тергеу жүріп жатыр. Марқұмның әпкесінің айтуынша, ағасына бірнеше адам шабуыл жасап, оны ұрып-соққан. Кейін ер адам ес-түссіз күйде өз көлігімен ауруханаға жеткізілген, деп хабарлайды Newsroom.kz.
Туысының сөзінше, оқиғаға дейін марқұмға оның бұрынғы пациенттерінің бірінің бұрынғы күйеуі бірнеше рет қоңырау шалып, балағаттаған. Кейін ол ер адамды кездесуге шақырған.
Әпкесінің айтуынша, кездесуге барған кезде ағасына үш адам шабуыл жасаған. Олар оны ұрып, көліктің жүксалғышына салып, Аса өзенінің маңына алып кеткен. Сол жерде ер адамды тағы да ұрған.
Одан кейін, зардап шегушіні өз көлігіне салып, ауруханаға жеткізген. Алайда оны көшеден тауып алғандарын айтқан.
Ер адам алған жарақаттарынан есін жимастан қайтыс болған.
Марқұмның артында екі кішкентай қызы қалды. Туыстарының айтуынша, ер адамға 30 жасқа толуына бірнеше күн қалған.
Полиция не дейді?
Жамбыл облысының полиция департаменті оқиғаның шамамен бір ай бұрын болғанын растаған. Қазір аталған факті бойынша сотқа дейінгі тергеу жүргізіліп жатыр.
Тергеу жалғасуда. Оқиғаның нақты мән-жайы мен оған қатысы бар адамдардың әрекетіне құқықтық баға тергеу нәтижесінде беріледі.