Қазақстанның Бас прокуратурасы психотроптық заттарды өндіру және таратумен айналысқан ұйымдасқан қылмыстық топқа қатысы бар деген күдіктіні Ресейден экстрадициялады. Оған мүлкін тәркілей отырып, 20 жылға дейін бас бостандығынан айыру жазасы қарастырылған.
Ведомствоның мәліметінше, күдікті Теміртауда аса ірі көлемде психотроптық заттар өндірген қылмыстық топтың құрамында болған.
Дайындалған заттар кейін Қарағанды облысының аумағында таратылған. Құқық қорғау органдары топ мүшелерінен шамамен 10 килограмм мефедрон тәркілеген.
Тергеу дерегінше, қылмыстық жолмен алынған табыс әртүрлі қаржылық операциялар арқылы, соның ішінде криптовалюта айырбастау қызметтері арқылы заңдастырылған. Жалпы сома 1,8 миллиард теңгеден асқан.
Сонымен қатар топ мүшелері 600 миллион теңгеден асатын жылжымайтын мүлік, бизнес нысандары мен көлік құралдарын сатып алған. Бұл активтерге мемлекет кірісіне кейіннен өткізу үшін тыйым салынған.
Прокуратураның хабарлауынша, аталған адам былтыр қазанда Ресей аумағында ұсталған. Осыдан кейін Қазақстан оны экстрадициялау туралы сұрау салған. Қазір күдікті Қазақстанға жеткізіліп, тергеу изоляторына қамалды.
Басқа қатысушыларға қатысты тергеу жалғасып жатыр. Істің бір бөлігі сотта қаралып жатыр, ал кейбір сыбайластары қылмыстық қудалау органдарынан жасырынып, халықаралық іздеуге жарияланған.
