Reuters агенттігінің мәліметінше, бағаның күрт қымбаттауына Иран төңірегіндегі әскери әрекеттер мен мұнай тасымалына төнген қауіп әсер еткен. Әсіресе әлемдік мұнайдың шамамен 20 пайызы өтетін Ормуз бұғазы арқылы жеткізілімнің бұзылу қаупі нарықтағы ахуалды күрделендіріп отыр. Сарапшылар бұл бағыт толық жабылған жағдайда әлемдік мұнай жеткізілімі тәулігіне миллиондаған баррельге қысқаруы мүмкін екенін ескертеді.
Қалыптасқан жағдайға байланысты бірқатар мемлекеттер стратегиялық мұнай қорын қайта есептеп, балама логистикалық бағыттарды қарастыруда. Ал OPEC+ елдері өндірісті аздап арттыру жөнінде келісімге келгенімен, сарапшылар бұл шешім нарықты толық тұрақтандыруға жеткіліксіз болуы ықтимал екенін айтады.
Сарапшылардың пікірінше, алдағы апталар мұнай нарығы үшін шешуші кезең болмақ. Аймақтағы кез келген әскери эскалация бағаның жаңа шегіне жол ашуы мүмкін.
