«Қазақстан темір жолы» ҰК» АҚ жолаушылары енді Астана – Омбы халықаралық бағыты бойынша сапар шегу кезінде жаңа деңгейдегі қызметті пайдалана алады. Аталған бағытқа отандық Railways Systems KZ холдингі шығарған «45» сериялы заманауи вагондар енгізілді.
Жаңа вагондардың іске қосылуы жолаушылар вагондары паркін жүйелі жаңарту жұмыстарының жалғасы саналады. Олар жолаушыларға жоғары деңгейдегі жайлылық ұсынады: эргономикалық дизайн, жеке баптауы бар климат-бақылау жүйесі және әр орынға орнатылған электр розеткалары ұзақ сапарларды барынша ыңғайлы етеді.
2026 жылдың наурыз айында компания 100 вагон жеткізу жоспарын мерзімінен бұрын орындап, соңғы партияны төрт ай ерте тапсырған болатын. Қазіргі таңда бұл вагондар ішкі және халықаралық бағыттарда, соның ішінде Ақтөбе – Маңғыстау, Маңғыстау – Семей және Қарағанды – Мәскеу бағыттарында пайдаланылып келеді.
Астана – Омбы бағыты Қазақстан астанасын Сібірдегі ірі көлік торабымен байланыстыратын маңызды маршруттардың бірі. Ол іскерлік және туристік ағым үшін сұранысқа ие, сондықтан жаңа вагондардың енгізілуі бағыттың тартымдылығын арттыра түседі.
Мамандардың айтуынша, вагондарды жаңарту жолаушылардың қауіпсіздігі мен жайлылығын қамтамасыз етуге бағытталған.
Бұл жұмыстар мемлекеттік бағдарлама аясында жүзеге асырылуда. 2030 жылға дейін елімізде шамамен 800 жолаушылар вагонын жаңарту жоспарланған, бұл жалпы парктің 90%-ына дейін жаңартуға мүмкіндік береді.
Сонымен қатар, жаңа келісімшарт аясында тағы 131 вагон сатып алу және олардың ішкі дизайнын жаңарту мәселесі қарастырылып жатыр. Жаңа үлгілерде заманауи түстер мен экологиялық материалдар қолданылмақ.
Сарапшылардың пікірінше, отандық өндірістегі вагондарды пайдалану әлеуметтік қана емес, экономикалық тұрғыдан да тиімді: қызмет сапасы артады, машина жасау саласы дамиды және өндіріс жергіліктендіріледі.
