Қазақстан делегациясы турнирді өткізуге жан-жақты дайын екенін көрсетті: спорттық инфрақұрылымнан бастап ұйымдастырушылық шешімдерге дейін толық қамтылды. Арнайы әзірленген бейнеролик ерекше қызығушылық тудырды. Онда Астананың заманауи келбеті мен халықаралық жарыстар өткізу әлеуеті таныстырылды.
Баяндама залдағы көрермендердің белсенді реакциясымен және қол шапалақтауымен сүйемелденді. Бұл әлемдік спорт қауымдастығы тарапынан жоғары қызығушылық бар екенін көрсетті.
Отырыста ITTF басшылығы, ұлттық федерациялар делегаттары және әлемдік үстел теннисі өкілдері қатысты.
«Біз үшін Қазақстанды осындай халықаралық алаңда таныстыру — үлкен мәртебе. Астана әлем чемпионатын үстел теннисі тарихында жаңа стандарт қалыптастыратын деңгейде өткізе алатынына сенімдіміз», — деп атап өтті Қазақстан делегациясының өкілдері.
Іс-шара аясында шетелдік делегаттарға әлем чемпионатының брендтік өнімдері де таныстырылды. Бұл қонақжайлылық пен ұлттық бірегейліктің символы ретінде ұсынылды.
«Қазақстан сенімділігін, жүйелі тәсілін және жоғары дайындық деңгейін көрсетіп отыр. Біз 2027 жылғы әлем чемпионатын Астанада асыға күтеміз», — деп атап өтті Халықаралық үстел теннисі федерациясында.
Айта кетейік, 2027 жылғы әлем чемпионатын өткізу құқығын Қазақстан 2025 жылы Катар астанасында өткен ITTF көпкезеңді және бәсекелі іріктеу нәтижесінде жеңіп алған болатын. Байқауға Қазақстаннан бөлек Франция, АҚШ, Бразилия және Қытай қатысты. Финалдық кезеңге Қазақстан мен Франция өтті, онда Қазақстан 54,68% дауыс жинап, Францияны (45,32%) жеңді.
Бұл шешім өңір үшін тарихи маңызға ие болды: алғаш рет үстел теннисінен әлем чемпионаты Орталық Азияда өтпек. Астанада турнир өткізу спортты дамытуға, елдің халықаралық беделін нығайтуға және елорданы әлемдік деңгейдегі ірі іс-шаралар өтетін орталық ретінде танытуға маңызды қадам ретінде қарастырылып отыр.
