Қазақстандық триатлоншы Арлан Жанабай Жапонияда өтіп жатқан XX жазғы Азия ойындарында қола медаль жеңіп алды. Бұл туралы Қазақстан Республикасының Туризм және спорт министрлігі хабарлады.
Министрліктің мәліметінше, бұл марапат Арлан Жанабай үшін халықаралық аренадағы маңызды нәтиже болды. Ол 2026 жылы Қытайдың Тайчжоу қаласында өткен Азия кубогы кезеңінде қола, ал Түркістандағы кезеңде күміс медаль иеленген.
«Бұл марапат қазақстандық триатлон үшін ерекше мәнге ие. Бұған дейін Азия ойындары тарихында отандық спортшылар бұл спорт түрінен бар болғаны бір ғана қола медаль алған еді. Осылайша, Арлан Жанабайдың нәтижесі Қазақстанның Азия ойындары тарихындағы триатлоннан алған екінші жүлдесі болды және ұлттық құраманың ілгері дамуын көрсетті», — делінген министрлік хабарламасында.
Ведомствоның айтуынша, бүгінде триатлон Қазақстанның 13 өңірінде дамып келеді. Спорт түрінің географиясы кеңеюі, федерация мен жаттықтырушылар құрамының жұмысы, сондай-ақ спорттық резервті жүйелі даярлау ұлттық құраманың алдағы нәтижелерін арттыруға негіз болып отыр.
XX жазғы Азия ойындары Аичи-Нагояда 4 қазанға дейін жалғасады.
