Павлодарда үш жастағы қыз стоматологта ем алғаннан кейін комаға түсті. Бұл туралы облыстық денсаулық сақтау басқармасы растады.
Әлеуметтік желілерде баланың туысы 21 қазанда Лермонтов көшесі, 100/2 мекенжайындағы стоматологияда тісін емдеу кезінде қыздың жағдайы күрт нашарлағанын жазды. Оның айтуынша, балада тыныс алу бұзылып, көзі айналып кеткен.
Жазбада дәрігер процедураны тоқтатпай, жұмысын жалғастыра бергені айтылған. Сондай-ақ анасының көмек сұрағанына қарамастан, бірден жедел жәрдем шақырылмағаны көрсетілген. Туысының айтуынша, кейінірек медбике көрші кабинеттен 103 қызметін шақырған.
Ауруханаға жеткізілген соң баланың жүрегі жедел жәрдем көлігінде тоқтаған, кейін тағы бір тоқтау Павлодар облыстық балалар ауруханасында болған. Қазір қыз реанимация бөлімінде ес-түссіз жатыр, өкпені жасанды желдету аппаратына қосылған.
Павлодар облысының денсаулық сақтау басқармасы 21 қазанда сағат 15:45-те 2023 жылы туған қыз Павлодар облыстық балалар ауруханасына жеткізілгенін хабарлады. Оны қабылдау бөлімінен өткізбей, бірден реанимацияға жатқызған.
Ведомство мәліметінше, дәрігерлер қарқынды ем жүргізіп жатыр, сонымен бірге ана мен бала ұлттық ғылыми орталығы мен ұлттық ғылыми кардиохирургия орталығының мамандарымен кеңесіп, әрі қарайғы емдеу тәсілін келісуде. Оқиғаның мән-жайын құқық қорғау органдары тексеріп жатыр, тексеру қорытындысы бойынша құқықтық баға берілмек.
