Қазақстанның Қорғаныс министрлігі әскерді жаңғыртуға бағытталған реформаның басталғанын хабарлады. Өзгерістер армияның құрылымын, басқару жүйесін, әскерді даярлау тәртібін, қызмет өту рәсімін және әскери қызметшілердің құқықтарын қорғауды қамтиды.
Ведомствоның мәлімдеуінше, мемлекет басшысы қазіргі заманға сай, мобильді әрі технологиялық әскер қалыптастыруды тапсырған. Бұл ретте әскери қызметтің қауіпсіздігіне, басқару мәдениетіне және мемлекеттік ресурстарды тиімді пайдалануға ерекше мән берілмек. Жоспарда Қарулы күштердің құрылымы мен құрамын, қорғанысты жоспарлауды, жұмылдыру даярлығын және резервті қалыптастыру жүйесін жетілдіру көзделіп отыр.
Ең ірі өзгерістердің бірі — мерзімді әскери қызметті екі кезеңге бөлу. Алғашқы алты айда бір шақырылымдағы жас сарбаздар оқу орталықтарында дайындықтан өтеді: қызметке бейімделеді, бастапқы әскери білім алады және дене даярлығын күшейтеді. Осы кезеңде олар тіл үйреніп, жасанды интеллектпен жұмыс істеу дағдыларын меңгере алады, сондай-ақ әскери мамандықтармен қатар, сұранысқа ие азаматтық кәсіптерді де игеруге мүмкіндік алады.
Келесі алты айда олар әскери бөлімдерде бөлімше құрамында қызмет атқарады. Бұл тәсілдің жекелеген элементтері бұрын «Sarbaz+» жобасында сыналған. Екі кезеңді қызметтің пилоттық жобасы 2027 жылы іске қосылады.
Әскери қызметшілердің құқықтарын қорғау үшін бөлім командованиесіне тәуелсіз әскери кеңесшілер институты құрылады. Олар заңбұзушылықтарды анықтауға және сарбаздардың заңды мүдделерін қорғауға көмектеседі. Басым бағыттардың қатарында сапалы тамақтану мен киім-кешек, сондай-ақ казармалар, оқу нысандары мен полигондарды жөндеу бар.
2027 жылдан бастап жастарды әскери-патриоттық даярлаудың «Жас айбын» бірыңғай жүйесі енгізіледі. Ол «Жас Қыран», «Жас Ұлан» және «Жас Сарбаз» кезеңдерін біріктіреді. Мектептерде қауіпсіз мінез-құлық, алғашқы көмек көрсету және төтенше жағдайларда әрекет ету үйретіледі.
Акиматтармен бірлесіп, мектептердегі бастапқы әскери дайындықты және әскери мектептер желісін дамыту жалғасады. Жоспардағы ұйымдастырушылық шараларды осы жылдың соңына дейін орындау көзделген, ал негізгі тұжырымдамалық өзгерістер орта мерзімде жүзеге асырылмақ.
