Әлеуметтік желілерде Қазақстан атынан төрелік еткен Надежда Парецкаяның шешімдері талқыға түсті. Пайдаланушылар ресейлік мәнерлеп сырғанаушы Аделия Петросян төрттік тулупта құлағанына қарамастан, дәл осы төрешіден ең жоғары – 147,04 ұпай алғанын атап өтті. Нәтижесінде спортшы алтыншы орынға тұрақтаған.
Сондай-ақ қазақстандық Софья Самоделкинаға берілген ұпайлар да сынға ілікті. Кей қолданушылардың пікірінше, төмен баға оның жарысты оныншы орынмен аяқтауына әсер еткен.
Қысқа бағдарламадағы Михаил Шайдоровтың нәтижесі де талқыланды. Желі авторлары ұпайдың салыстырмалы түрде төмен болуы спортшыны еркін бағдарламада тәуекелге барып, күрделірек элементтер қосуға мәжбүрледі деп есептейді. Соған қарамастан Шайдоров алтын медаль жеңіп алып, Олимпиада чемпионы атанды.
Қазақстан мәнерлеп сырғанау одағы төрешілер жұмысына баға беріп, ресми түсініктеме жасау құқығы тек Халықаралық конькишілер одағына тиесілі екенін мәлімдеді. Ұйым жанкүйерлерді эмоцияға берілмей, ұстамдылық танытуға шақырды.
Спорт министрлігі әзірге бұл жағдайға байланысты пікір білдірген жоқ.
