Ішкі істер министрлігінің мәліметінше, жолдардағы құқық бұзушылықтарды автоматты түрде тіркейтін кешендердің саны 28 мыңнан 32 мыңға дейін артқан. Мұндай жүйелер жол ережесін бұзған көліктерді тіркеумен қатар, мемлекеттік нөмірлер арқылы іздеудегі және жалған нөмірмен жүрген көліктерді анықтауға мүмкіндік береді.
Сонымен қатар жолдардың 22 учаскесіне 56 лазерлік құрылғы орнатылған. Олар әсіресе түнгі уақытта және тұман, боран, қатты жаңбыр сияқты қолайсыз ауа райы кезінде жүргізушілерге жолды бағдарлауға көмектеседі.
Жыл соңына дейін тағы 20 учаскеге 48 лазерлік жүйе орнату жоспарланып отыр.
Бұдан бөлек, республикалық маңызы бар 12 бағытта көліктің орташа қозғалыс жылдамдығын бақылау жүйесі жұмыс істейді. Бұл технология көліктің жылдамдығын бір нүктеде емес, жолдың белгілі бір учаскесі бойынша бақылауға мүмкіндік береді.
ІІМ мәліметінше, цифрлық технологияларды қолдану жол қозғалысы ережелерін бұзуды анықтауға, қауіпті жағдайларға жедел ден қоюға және жол-көлік оқиғаларының алдын алуға бағытталған.
