Ислам дінінде қасиетті күндер, түндер және айлар қамари жыл санауы негізінде анықталады.
"Мұндай жыл санақ ай фазасының өзгеруіне қарай есептеледі. Жаңа айдың (һиләлдың) көрінуімен жаңа ай басталады. Қамари ай кейде 29 не 30 күн болады. Зулхижжа айын анықтау үшін зул-қағда айының 29-ында айды бақылайды. Күн батқан кезде жаңа ай көрінсе, келесі күні зул-хижжа айы басталған болып саналады. Егер ауа бұлтты болып, ай көрінбесе, зул-қағда айын 30 күнге толықтырады. Осыған орай, 2025 жылы 27 мамырда жаңа айдың көрінуіне байланысты биыл зұлхижжа айы 28 мамырда басталып, арапа 5 маусымға, ал құрбан айт 6 маусымға сай келеді", – деді Қазақстан мұсылмандары діни басқармасы.
Мүфтият бекіткен діни мерекелер кестесіне сәйкес, Құрбан айт үш күн бойы – 6, 7 және 8 маусым аралығында аталып өтеді.
Қазақстан Республикасы Еңбек кодексінің 84-бабына сәйкес, Құрбан айттың бірінші күні – 6 маусым (жұма) – барлық еңбек режиміне қарамастан ресми түрде демалыс күні болып саналады.
Осылайша, маусым айында қазақстандықтар жұмыс аптасының түріне қарай келесі тәртіппен демалады:
Бес күндік жұмыс аптасы бар қызметкерлер үшін: 6, 7 және 8 маусым – үш күн қатарынан демалыс.
Алты күндік жұмыс аптасы барлар үшін: 6 және 8 маусым – демалыс күндері, ал 7 маусым – жұмыс күні.
