Оңтүстік Африкада бірнеше сағат аралықпен болған екі жаппай атыста 27 адам қаза тауып, тағы ондағаны жараланды. Бұл елдегі қарулы қылмыстың жоғары деңгейіне қатысты алаңдаушылықты күшейтті.
Сенбі кешінде Йоханнесбургке жақын барда сегіз қарулы адам оқ жаудырып, 17 адамды өлтірді. Тағы 15 адам жарақат алған. Полицияның хабарлауынша, қаза тапқандардың 13-і ер адам, төртеуі әйел.
Шабуыл жасағандар оқ атқаннан кейін екі көлікті өртеп, оқиға орнынан қашып кеткен. Аймақтық полиция комиссарының орынбасары, генерал-майор Фред Кекана бұл шабуыл өткен айда болған бір оқиғаға жауап ретінде жасалған болуы мүмкін екенін айтты. Ол кезде бір адам қаза тауып, тағы бірі жараланған еді.
Кейптаун маңындағы елді мекендегі ойын-сауық орнының сыртында жексенбіге қараған түні болған екінші атыста 10 адам қаза тауып, тағы 11 адам жараланды. Бесеуі оқиға орнында көз жұмса, тағы бесеуі ауруханада қайтыс болған.
Жексенбі таңына дейін екі оқиға бойынша да ұсталғандар болмаған. Полиция шабуылдардың нақты себебін жариялаған жоқ.
Оңтүстік Африкада заңсыз қару көп таралған, ал қарулы қылмыс ондаған жыл бойы шешілмей келе жатқан мәселе болып отыр. Елде күн сайын шамамен 60 кісі өлтіру тіркеледі. Соңғы жаппай атыстар бандалар арасындағы аумақ үшін таласпен, есірткі саудасымен және заңсыз кен өндірумен байланысы бар қақтығыстарға қатысты үрейді күшейтті.
