Қазақстан қор биржасындағы саудада АҚШ валютасы 450 теңгеге дейін төмендеді. Мұндай деңгей долларда 2024 жылғы маусымнан бері байқалмаған.
Сарапшылар теңгенің күшеюіне бірнеше фактор әсер етіп отыр дейді. Олардың қатарында мұнайдың қымбаттауы, геосаяси ахуалдың өзгеруі, шетел капиталының келуі және теңгелік активтердің жоғары табыстылығы бар.
Центр исследований прикладной экономики (AERC) бас директоры Жаныбек Айғазиннің айтуынша, Ұлттық банктің қазіргі 16,25 пайыздық жоғары базалық мөлшерлемесі теңгені қолдап отыр. Оның сөзінше, бұл инвесторларға теңгемен салынған қаражаттан көптеген долларлық активтерге қарағанда көбірек кіріс алуға мүмкіндік береді.
Қаржылық кеңесші Арман Байғанов та Таяу Шығыстағы геосаяси шиеленіс мұнай бағасын өсіргенін, соның салдарынан қазақстандық активтерге қызығушылық артқанын айтты. Экономист Эльдар Шамсутдиновтың пікірінше, ішкі валютаға сұраныстың бәсеңдеуі де әсер еткен: тұтынушылық кредит беру қарқыны 2021–2024 жылдардағы орташа 32 пайыздан 2026 жылдың бірінші жартысында 3,1 пайызға дейін түскен.
Экономистер доллар 450 теңгеден төмендеуі мүмкін екенін айтады, бірақ 400 теңгеге дейін құлдырайды деп нақты болжам жасаған жоқ. Алдағы бағытқа геосаяси жағдай, мұнай бағасы, Ұлттық банк пен АҚШ Федералдық резерв жүйесінің шешімдері, сондай-ақ капитал қозғалысы мен әлемдік нарықтағы доллар бағамы әсер етеді.
Эльдар Шамсутдиновтың айтуынша, 450 теңге деңгейі доллардың арзан екенін білдірмейді және оның міндетті түрде бұрынғыдан жоғары көтерілуі шарт емес. Жаныбек Айғазин де жинақ ақшаны сақтау үшін қазіргі таңда теңге анағұрлым тиімді болып тұрғанын, себебі базалық мөлшерлеме инфляция деңгейінен жоғары екенін атап өтті.
